فاجوميّات

موضوع: فاجوميّات الأحد أغسطس 01, 2010 7:14 pm

السلام عليكم
ازيكم يا جماعة؟
إن شاء الله فى الموضوع دا هنستعرض أشهر أعمال شاعر العامية الكبير أحمد فؤاد نجم

اتمنى الموضوع و الفاجوميّات المختارة ينالوا إعجابكم فاجوميّات 954712

فهرست
1. العيسوى بيه
2. كلب الست
3. شرم برم
4. غزة فى قلب العرب
5. شمعة
6. الفول و اللحمة

موضوع: 1. العيسوى بيه الأحد أغسطس 01, 2010 7:18 pm

العيسوى بيه

شوف عندك يا سلاملم

واتفرج يا سلام

ع المدعو دومه عيسوي

وزير الأمن العام

في الفصل الإنتخابي

من مرسح السلام

سارح بالبلطجيه

والهجامة القدام

عشان ضمان عبوره

من دايرة الانتقام

واتفرج يا سلاملم

ع العيسوي يا سلام

العيسوي بيه

العيسوي بيه

صاحب البوكسات

العيسوي بيه

و الحبسخناتات

العيسوي بيه

ملك اللومانات

العيسوي بيه

والمعتقلات

العيسوي بيه

بشرى لجميع الهباشة

العيسوي

رمز الطفاشة

سبحان الله

من اومباشه

حكم المأمور

يا ما شاء الله عليه

العيسوي بيه

العيسوي بيه

بشرى لجميع الحشاشة

العيسوي بيه

رمز الماشه

من اجل ضمان الحرية

لجميع تجار الباطنيه

العيسوي بيه ميه الميه

حيخلي القرش

بربع جنيه

العيسوي بيه

العيسوي بيه

خليكوا فاكرين

العيسوي بيه

تنتخبوا مين

العيسوي بيه

فليحيا امين

العيسوي بيه

ابن ام مين

العيسوس بيه

العيسوي بيه

العيسوي بيه

للعودة إلى الفهرست ، اضغط هنا

موضوع: 2. كلب الست الإثنين أغسطس 02, 2010 7:22 pm

كلب الست

ف الزمالك من سنين

و ف حمى النيل القديم

قصر من عصر اليمن

ملك واحدة من الحريم

صيتها أكتر م الأدان

يسمعوه المسلمين

و التتر

و التركمان

و الهنود

و المنبودين

ست فاقت ع الرجال

ف المقام و الاحترام

صيت و شهرة

و تل مال

يعني في غاية التمام

قصره يعني هي كلمة

ليها كلمة ف الحكومة

بس ربك لجل حكمة

قام حرمها م الأمومة

و الأمومة طبع ثابت

جوه حوا من زمان

تعمل ايه الست

جابت فوكس رومي و له ودان

فوكس دا عقبال إملتك

عنده دستية خدامين

يعني مش موجود ف عيلتك

شخص زيه يا اسماعين

و اسماعين دا يبقى واحد

م الجماعة الغلبانين

اللي داخو ف المعاهد

و المدارس من سنين

حب يعمل واد فكاكه

و يمشي حبه ف الزمالك

و القيامة و الفتاكة

يرموا طبعا ع المهالك

غم سمعه من قيامته

حب يعمل فيها فله

بعد ما ألوط بيجامته

اشترى حتة مجله

قول مش بيقراف حكاية

من حكايات الغرام

و اندماجه ف القرايه

خلا مشيه مش تمام

ع اليمين يحدف بعيد

خطوتين

و تروح شمال

لمحه فوكس من الحديد

قال دا صيد

سهل و حلال

هب نط ف كرشه دوغري

جاب بيجامته لحد ديلها

اسماعين بدال ما يجري

قال يا رجلي

رجلي مالها

بص شاف الدم سايح

من عاليها و من واطيها

و ياللي جاري

و ياللي رايح

المجلة مش لاقيها

حبه و تلمو الظنايا

اللي هما البوابين

و الهكايه و الروايه

قال لهم دا كلب مين ؟

كلب مين

ما كلب مينشي

سمعه لبخ حبتين

قال له واحد فيهم امشي

اللي جابك انده مين

قال دا شارع يا مواشي

للجميع

راكب و ماشي

كلمة من دا

و كلمة من دا

ظاطو و انقلبت فضيحة

قول نهايته و القصد من دا

اسماعين شرب الطريحة

راحو اسم الشرطة جمعا

و النيابة كفيلة بيهم

و اترموا ف الحجر طبعا

لما ييجي الدور عليهم

شاف بلاوي ما تنحكيش

م الهفايا المحبوسين

قال يا عالم

يا شاويش

يا نيابة .. يا مسؤلين

خلصوه بعد المناهدة

جثه

من جحر الديابه

هي يمكن ساعة واحدة

كان ف مكتب النيابة

قال له ـ مالك يا اسماعين

قال له ـ زي البمب مالي

قال له ـ عضك فوكس فين

قال له ـ سيبني أروح لحالي

انت شوف سي فوكس يمكن

خد تسمم غصب عني

الوكيل قال برضه ممكن

و الشاويش قعد يغني

هييص يا كلب الست هيص

لك مجامك ف البوليس

بكرة تتولف وزارة

للكلاب

ياخدوك رئيس

انت توى ف النيابة

تسعمية من الغلابة

طب يا ريت يا فوكس كنا

و لا تربطنا الجرابة

انت فين و الكلب فين

انت كده يا اسماعين

طب دا كلب الست يا ابني

و انت تطلع ابن مين

بشرى لصاحب الديول

ولــللي له أربع رجول

بشرى لسيادنا البهايم

من جمايس أوعجول

اللي صاحبه يا جماعة

له أغاني ف الاذاعة

راح يدوس فوق الغلابة

و النيابة

بالتباعة

هيص يا كلب الست هيص

هيص يا كلب الست هيص

للعودة إلى الفهرست ، اضغط هنا

فظييييييييييييييييييييييييع الموضوع

أنا متااااااااااااااااااااابعة

(اختيار حلو للقصيدتين) فاجوميّات 954712

موضوع: رد: فاجوميّات السبت أغسطس 07, 2010 11:38 pm

أشكر لكِ المرور يا عصاية smile

موضوع: 3. شرم برم الإثنين أغسطس 09, 2010 9:37 am

شرم برم

أنا الأديب الأدباتي

غايظني حال بلدياتي

و غلبت أوحوح و أهاتي

لكن بلدنا

سمعها ثقيل

الله الله يا بدوي

هات الشخاليل

شرم برم

و الناس غافلة

و الغفلة

ع الأفهام قافلة

و الكذب لعلع ف الحفلة

و أغلب السامر مساطيل

الله الله يا بدوي

دق الشخاليل

حالتنا ما تسرش انسان

و حالنا

يصعب ع الغلبان

لكن يا خلق علينا لسان

لو جريناه ع الصلب

يسيل

الله الله يا بدوي

يا أم الشماليل

السوس نخب سقف العشة

و عضمة الغنمات

هشة

عايزين صابونة و مقشة

و هات ياكنس

و هات يا غسيل

الله الله يا بلدي

مشوارنا طويل

آدي العبارة يا متولي

و آدي الصراحة اللي تخلي

عرق الغضب

فينا تمللي

بالجهل نافر

و التضليل

الله الله يا بدوي

لم الشخاليل

للعودة إلى الفهرست ، اضغط هنا

ناح الحمام في الدوح..دمع البنفسج سال..
والورد..مال مجروح
من شكة الموال
قال الحمام .. ياليل..ويا عيني ع اللي إنقال
مين يشتري الفيروز؟
غزه .. مع الدلال!

من فين يا شابه النسب…وبنت مين في الناس ؟
ومين في ناسك حسب…وعطاكي.. للنخاس!
بحرين عيونك أسى…ساقيين .. قلوب الناس
من فين يا شابه النسب
وبنت مين في الناس !؟

قالت _ بلهجة عرب _
غزه .. في قلب العرب
حره .. وأهلي عرب
خالص..وبنت حلال

ألا أونا بنت العرب
للبيع..ومين قال كام ؟
سنيوره شبه القمر
مصنوعه .. للأحلام
يا حلال..على المقتدر
وع الغلابة حرام..دق الجرس بالعدد
واحد…ومين قال كام ؟
البنت من بدعها..ضحكت
ومن قلبها..عشقت
ومن وجدها..سمع الوجود زلزال

لايا عديم التنا
لاانت..ولا البايعين
سوق النخاسة جبر..والأهل بالملايين
أبويا باني الحرم..وامي من القدسين
ومصر..فيها الهوى
والعزوه..في الشرقين
حلفت بالمرحمه
والدم..والملحمة
والفارس اللي حمى
ما امشي..ورا الأندال
ما امشي
ورا الأندال

للعودة إلى الفهرست ، اضغط هنا

موضوع: 5. شمعة الجمعة أغسطس 20, 2010 3:03 pm

شمعة

قيدوا شمعة يا أحبة و نورولي
رمشتين من رمش عين
و بيندهولي
من هنا سكة ملامة
من هنا سكة ندامة
سكتين يا للا السلامة
أمشي فين يا ناس قولولي
قيدوا شمعة و نورولي

رمشتين من رمش جارح
فوق عيون السحر طارح
زادوا نبض القلب حبة
بالأماني بالمحبة
و الأماني هناك بشوكها
طالعة فوق الشط دوكها
بتلاغيني
و تناديني
من بعيد
و تقول آديني
كان بودي
عايز أعدي

و الظنون بتقولي هدي
من هنا سكة ملامة
من هنا سكة ندامة
سكتين ياللا السلامة
أمشي فين يا ناس قولولي
قيدوا شمعة و نورولي

قيدوا شمعة يا صبايا
نورولي و طمنوني
بحر بيني و بين هوايا
موجه يشبه موج ظنوني
كل موجة شايلة شيلة
حلم ليلة
و فكر ليلة
عد موج البحر يا اللي
شفت حالي و قولي لخلي
كان بودي عايز أعدي
و الظنون بتقوللي هدي
من هنا سكة ملامة
من هنا سكة ندامة
سكتين يا اللا السلامة
أمشي فين يا ناس قولولي
قيدوا شمعة
و نورولي
مال يا قلبي العشق بينا
مال
و خالي البال يلومنا
مال وقال للشوق يجينا
في الليالي يقل نومنا

بين مسانا
و بين صباحنا
نصحى و الناس نعسانين
موعودين بالحرح يا احنا
و الدوى للموعدين
ايه دا كل يا قلبي ايه دا
شوف طريق العقل و اهدا
من هنا سكة ملامة
من هنا سكة ندامة
سكتين يا للا السلامة
أمشي فين يا ناس قولولي
قيدو شمعة
و نورولي

للعودة إلى الفهرست ، اضغط هنا

الفول و اللحمة

عن موضوع الفول واللحمة صرح مصدر قال مسئول

ان الطب اتقدم جدا والدكتور محسن بيقول

ان الشعب المصري خصوصا من مصلحته يقرقش فول

حيث الفول المصري عموما يجعل من بني ادم غول

تأكل فخده في ربع زكيبه والدكتور محسن مسئول

يديك طاقة وقوة عجيبة تسمن جدا تبقى مهول

ثم اضاف الدكتور محسن ان اللحمه دي سم أكيد

بتزود أوجاع المعدة وتعود على طولة الايد

وتنيم بني ادم أكتر وتفرقع منه المواعيد

واللي بياكلوا اللحمة عموما حيخشوا جهنم تأبيد

يادكتور محسن يامزقلط يامصدر ياغير مسئول

حيث ان انتو عقول العالم والعالم محتاج لعقول

مارأى جنابك وجنابهم فيه واحد مجنون بيقول

احنا سيبونا نموت باللحمة وانتو تعيشوا وتاكلوا الفول

مارأيك ياكابتن محسن مش بالذمة كلام معقول

للعودة إلى الفهرست ، اضغط هنا

موضوع: رد: فاجوميّات الأحد سبتمبر 05, 2010 5:41 pm

حلوة اووى القصايد ديه

تسلم ايدك مستنين الجديد

شرفنى مرورك يا سهير
سعيد ان الموضوع عاجبك smile