قول للزمان ارجع يا زمان

حاجات كتييييير بتخلينى اشتاق للزمن اللى كانت فيه مصر جميله
زمان فى الخمسينات و الستينات رغم المساوئ الا ان الشعب المصرى كان فى حاله اقتصاديه و معنويه و فكريه و ثقافية احسن من دلوقت بكتير
حاجات كتير بتخلينى افتقد الزمن ده واترحم عليه

اول حاجه حالة الحراك الثقافى و تقدير العلم اللى كانت موجوده فى الزمن ده
كنا ممكن نسمع اتنين بيتخانقوا مع بعض على اغنية ام كلثوم الاخيره "اللى هى باللغة العربيه الفصحى"
وهل انها كانت تقول اعطينى حريتى اطلق يدى ولا تقول اعطنى حريتى فك اسرى افضل
و كان عندنا فى كل مجال ناس علامه متلاقيش زيهم دلوقت و كانوا نجوم المجتمع من المفكرين و العلماء
كان عندنا اعلام زى محمد حسنسن هيكل و احمد بهاء و مصطفى و على امين فى الصحافه وكان عندنا ام كلثوم و عبد الحليم و فريد الاطرش و الشيخ امام فى الغنا وكان عندنا عباس العقاد و طه حسين و يوسف ادريس فى الادب وكان عندنا شعراء من نوعية احمد رامى و الابنودى "اطال الله عمره" وامل دنقل وكان عندنا علماء نجوم مجتمع زى مصطفى مشرفه و جمال حمدان و....و.....و....

وكان الشعب المصى حاسس انه عنده كرامه و راسه براس الدول العظمى كانت بتخاف منه و تعمل ضده مؤامرات عشان توقعه "وكلنا عارفين ان مافيش حد بيبقى عايز يوقع حد الا لانه قوى"

كنا عايشين فى جو تعبئه عامه و كنت تلاقى الشباب عنده حماس انه ممكن يموت نفسه فى سبيل بلده لانه كان حاسس انها بلده فعلا بتاعته

كان زمان الشعب المصرى متسامح دينيا ماكنتش تلاقى واحد بيرفض يتعامل مع المسيحى لمجرد انه مسيحى
ماكنتش تلاقى اللى بينادى بطرد الاقباط من مصر
ماكنتش تلاقى اللى بيعطى الوظيفه لواحده لمجرد انها محجبه مع ان فى واحده اكفأ منها بس غير محجبه
ماكنتش تلاقى اللى بيبص لغير المحجبات نظرة احتقار لانهم كانوا عارفين ان دى حرية شخصية
ماكنتش تلاقى مناظر الدقون اللى للركب و مناظر البدو المتخلفين و الدعوات بالعوده الى الوراء
ماكنتش تلاقى التدين الزائف اللى مخبى وراه شخصيات اقل ما يقال عنها انها زباله

زمان ماكانش فى الفساد اللى احنا شايفينه دلوقت اللى هو علشان تممشى اى مصلحه لازم تفتح الدرج و قبله لازم تفتح دماغك

زمان ماكنش فى نسبة فقر تتعدى 40 % من الشعب
زمان ماكانش فى مبيدات مسرطنه
زمان ماكانش فى مياة صرف صحى مخلوطه بمياه الشرب

زمان ماكانش اى امين شرطه حقير يقدر يقولك انت عارف انت بتكلم مين

زمان كان الرئيس كان بيلقى خطابه وسط الناس من غير حواجز

زمان كان الرئيس بيبدأ خطابه بواحده من كلمتين يا اما بسم الامه او بسم الله

انما دلوقت الريس بيبدا خطابه "بسم النبى حارسك و صاينك"

زمان ماكانش فى احمد عز و اسياخ الحديد

زمان ماكانش فى هشام طلعت و سوزان
زمان كان ابطالنا من نوعية عبد المنعم رياض و البطل احمد عبد العزيز

دلوقت بطل مصر القومى هو نجم الجيل "تامر حسنى"

زمان كان النشيد القوى المصري " تاليف و تلحين سيد درويش"

دلوقت النشيد القومى تاليف ايمن بهجت قمر

زمان كان فى دولة اسمها مصر

و عايزنا نرجع زى زمان قول للزمان ارجع يا زمااااااااااااااااااااااان

المقال ده بيقول بس لاى حد بيدعى على ناس زمان

فى بيت عربى بيقول:

دعوت على عمرو فمات.....فسرنى
فعثرت على اقوام....بكيت على عمرو

والله ولى التوفيق

احمد منصور
31/7/2009

الحقيقة مقال جميل جدا يابوحميد وانا بحييك على شغلك الكبير

وفعلا عمر ما الحاجات بتاعة زمان هترجع تاني

بس احنا دلوقتي أكيد في ازمة وهتعدي ان شاء الله

في البداية احب احييك على مقالك و على ابداء رأيك

واحييك الف مرة على انك تحمل عقلية مفكر ولست رجل سطحي المعرفة
ولكن احب ان اشير الى اشياء انا انتقدها
في ذاك الزمن كانت نسبة وعي الناس بالنسبة للامة ومشاكلها قليلة جدا
يعني مثلا الناس ما كانوش يعرفوا ان فيه نكبة حصلت الا بعديها بفترة طويلة كان اكثر ما يشغل الناس حينها الطرب والفن بالرغم من وجود كما اشرت عتاولة في الادب حينها
كان الشعور بالوحده مع الدول العربية المجاورة معدوم كنا عالم اخر
صحيح كان الاقتصاد المصري ممتاز في ذالك الوقت واوافق ان التعليم كان ايضا كذلك
ويكفي تبرع الباشاوات بقصورهم من اجل التعليم مثل العيني باشا وغيره
ولكن كانت مايميز البلد حينها انها كانت تعتمد على جميع خريجين الكليات وكيف كانت الكليات الادبية مثل الحقوق مثلا التي لم يكن في مصر بطل قومي الا ومر على هذه الكلية التي كانت للباشاوات
اما بعد الثورة وتأسيس المصانع اتجه الناس الى الكليات العملية مثل الهندسة وغيرها
ولكن هذا ليس ما يجب ان نتحدث فيه
عموما انا احييك مرة اخرى
واستمر

الحقيقه المقال ده بيعبر عن نفس شعورى
نفسى أرجع زمان
الزمن اللى ماما دايما كانت تحكيلى عنه
الحقيقه أنا من كتر ما سمعت عنه
حبيته جدا
والحقيقه ان فيه مشاكل كتيير هى اللى حولت شعب زمان لشعب دلوقت
ويارب نعرف حلها عشان نرجع لشعب زمان
شكرا جدا ع المقال الجميل

سلااااااااااااام

رائع المقال يا منصور
أحييك عليه
معانيه كلها جميلة ؛ و دا الكلام اللى جوا كتير قوى مننا
احنا الحال ساء بينا قوى بجد ، زيادة عن اللزوم

بس احنا بقينا فى وضع ، كلمة نرجع فيه مرفوضة زى ما بيقولوا فى الرياضة rejected
الحل هو اننا نتقدم ؛ بمعنى آخر ماينفعش نحلم بامبارح بتاعنا ، وضعنا و وضع العالم من حوالينا بيحتم علينا نلحم بالتكيف مع بكرة و التعامل مع العولمة و التكنولوجيا بشكل إيجابى
و أكيد دا ما يمنعش ان طعم حياتنا ، مش هقول يبقى زى بتاع زمان لانى شايفها صعبة ، انما مايمنعش ان طعم حياتنا يبقى احسن من دلوقت ع الأقل
ربنا يلطف بينا

زمان حلو فى كل حاجه ولوان مؤمن بان ولاد النهرده ومن راى ان الانسان اللى شايفه واحشه يجب يغيره من نفسه دى حاجه والتانيه اننا ما نبصش لمبرح الاللاتعاظ وتجديد الحاضر

ومقالتك جامده جدا

زمان كان فى دولة اسمها مصر

el gomlaa d btl5s el mwdoo3

احييك علي المقال
بس احب اقول ان زمان كان في رجاله بمعني الكلمة ناس حسة بالمسؤليه كان الناس عندها اهداف الحاجات دي انا مفتقداها بجد
ياريت الكلام دة يخلينا نتعلم من الحاجات الحلوة الي كانت موجودة زمااان ويفيدنا في بكرة

احيييييييك على المقال يا احمد
ياريت الزمن الجميل ده يرجع تانى فعلا

» فزورة اينشتاين هو ماعرفش يحالها زمان ورينا يا عبقري هتعرف تحللها ازاى?